«Бастау» кинофестивалі аясында «Арман» кинотеатрында Макс Акбаровтың «Дала» атты фильмінің қазақстандық премьерасы өтті. Атақты продюсер және актердің дебюттік режиссерлік жұмысы Bastau Debuts байқауына қатысуда.
Картина Қазақстан даласындағы браконьерлермен күреске түскен табиғатты қорғау инспекторларының оқиғасын баяндайды. Фильм 2019 жылы браконьерлермен арпалыста ерлікпен қаза тапқан инспекторлар Ерлан Нұрғалиев пен Қаныш Нұртазиновты еске алуға арналған, деп хабарлайды аlmaty-akshamy.kz.
Фильм көп уақыттан бері халықаралық көрмелерді аралап жүр – «Даланы» бүкіл әлем бойынша 20-ға жуық кинофестивальдің көрермендері бағалап үлгерді. Әзірше авторлардың қоржынында 11 жүлде бар. Енді міне кино отандық кино сүйер қауымға да жетті.
«Бұл әлеуметтік маңызы бар фильм, біз оны кинофестивальдерге барады деп ойлаған жоқпыз. Түсірілімнің өзі өте қызықты, ерекше болды, әсіресе мен үшін – себебі бұл менің режиссерлік дебютім. Қиын сәттер де болды, біз қыста минус 47 градуста түсірдік, боран болды, далада бірнеше сағатқа актерларымыз адасып кетті. Жазда плюс 50-де түсірілді, онға жуық көлік бұзылды. Экшн көп болды. Осындай экстремалды кадрлардың арқасында біз Лондондағы «International MOTOR AWARDS» кинофестиваліне қатыстық, онда соңғы «Форсажбен» «үздік каскадерлік трюктер» номинациясында болдық», - деді дебютант Макс Акбаров.
73 минуттық қысқа хронометражға қарамастан, картинада өте мықты актерлік құрам. Кадрдың әр шаршы метрі үшін Дәурен Серғазин, Ержан Түсіпов, Төлепберген Байсақалов, Ерболат Алкожа, Нышанбек Жұбанаев, Сергей Уфимцев, Ержан Жарылқасынұлы, Сейдулла Молдаханов және атақты ресейлік актер Сергей Гармаш секілді танымал актерлер күреседі.
Басты рөлді орындаушы Сейдулла Молдаханов түрлі кинофестивальдерде үш марапатқа ие болды, ал Акбаровтың өзі қазан айының басында XV Ташкент халықаралық кинофестивалінде «Үздік дебют» жүлдесіне ие болды.
Туынды Ақмола және Қостанай облыстарында түсірілген, оның бюджеті шамамен 180 миллион теңгені құрайды. Фильм келесі жылы прокатқа шығады деп күтілуде.
Ал 14 желтоқсан күні кешке фестиваль қонақтарын тағы екі қазақстандық премьера – Дәулетжан Махмұттың «Глобус» және Нариман Туребаевтың «Ол шайнекті сатып алды» фильмдері және Айсұлтан Сейітовтың «Қаш» фильмінің арнайы көрсетілімі күтеді.
Фестиваль дәстүрлі түрде Tanaris Production және A-Team кинокомпанияларымен Алматы қаласы әкімдігінің және ҚР Мәдениет және ақпарат министрлігінің қолдауымен ұйымдастырылады.
