Бүгін Конституциялық комиссияның кезекті отырысында бірінші болып сөз алған Бас прокурордың бірінші орынбасары Жандос Өмірәлиев жаңа Конституцияның 18-бабының қазақ және орыс тіліндегі нұсқаларында неге айырмашылық бар екенін түсіндірді, - деп хабарлайды aqshamnews.kz тілшісі.
«Комиссия қарауына Конституцияның 18-бабына қатысты бірқатар ұсыныстар келіп түсті. Заңгерлер мен мамандардың пікірінше, заң техникасы тұрығысында сұрақтар бар. Атап айтсақ, осы баптың екінші тармағында «сот шешімінсіз адамды заңда көзделген мерзімінен артық ұстауға болмайды» деп көрсетілген. Бұл дұрыс жазылған мәтін. Бірақ, орыс тіліндегі аудармасында «мерзімінен артық ұстау» деген шешуші ұғым көрсетілмей қалған. Сондықтан, кейбір мамандар «сот шешімінсіз күдіктіні мүлде ұстауға болмайды» деп түсіну қауіпі бар екенін айтуда. Қалыптасқан сот тергеу тәжірибесі қиындыққа тірелуі мүмкін деген пікірлер бар. Мәтін мазмұнына қарасақ расында да дәл солай. Кісі өлтіру, басқа да қоғамға қауіпті қылмыстар кідірісті көтермейтіні айдан анық. Қылмысты тоқтату, күдіктіні ұстау, оны дереу оқшаулау құқық қорғау органдарының ең негізгі міндеттері. Тек осыдан кейін оны күзетпеу ұстау шешімді сот қабылдайды. Бұл дүниежүзілік практика», - деді Өмірәлиев.
Сондықтан, ол талқылаудағы осы норманы нақтылауды ұсынды.
«Конституция еліміздің басты құқықтық темірқазығы. Оның әрбір нормасы анық және түсінікті болуы керек. Екіұшты болмау керек. Сондықтан, талқылаудағы осы норманы қайта қарап, нақтылауды ұсынамын», - деді Өмірәлиев.