Қазақстан Республикасының Бас прокуратурасы мемлекет басшысының тапсырмаларын орындау мақсатында құқық қорғау және арнайы органдармен бірлесіп, нашақорлық пен есірткі саудасына қарсы кешенді шаралар қабылдауда. Осы жұмыстар аясында 75 есірткі зертханасының қызметі тоқтатылып, 87 адам, соның ішінде Молдова, Латвия, Үндістан және басқа да елдердің азаматтары ұсталды. 1,3 тоннадан астам синтетикалық есірткі тәркіленді, деп хабарлайды aqshamnews.kz.
Құқық қорғау органдары есірткі саудасымен айналысатын 13 қылмыстық топтың, оның ішінде екі трансұлттық қылмыстық топтың әрекетін әшкереледі. Сонымен қатар, «Нашақорлыққа жол жоқ» атты есірткіге қарсы іс-шаралар тұрақты түрде өткізіліп келеді. Нәтижесінде есірткі насихаттағаны үшін 17 адам ұсталып, 10 мыңнан астам нарко-граффити жойылды.
Заманауи технологиялардың дамуы есірткі сатушылардың интернет-платформаларды пайдалану арқылы заңнан тыс әрекеттерін жасыруына мүмкіндік берген. Осыған байланысты тәртіп сақшылары көбінесе тек есірткі таратушыларды (закладчиктерді) ғана емес, сонымен қатар қылмыстық иерархияның жоғарғы деңгейіндегі ұйымдастырушыларды да әшкерлеуге кірісті. Қазіргі уақытта есірткі саудасынан түскен заңсыз табысты бақылап отырған «кураторлар» мен есірткі бизнесінің басқа да ұйымдастырушылары ұсталды.
Құқық қорғау органдары есірткі бизнесінің әрбір буынын анықтауға бел буған. Бұл мақсатта есірткі жарнамалаушыларынан бастап, есірткі саудасын ұйымдастырушыларға дейінгі барлық деңгейдегі қылмыскерлердің әрекеттері анықталуда.
Бас прокуратура азаматтарды есірткі тұтынудан және есірткі бизнесіне қатысудан сақ болуға шақырады. Заң мен тәртіптің үстемдігі қоғам мен әрбір азаматтың қауіпсіздігін қамтамасыз етеді. Осы қағидат сақталған жағдайда ғана біз әділ, таза және қауіпсіз Қазақстанды құра аламыз.