ҰБТ-ны екі рет тапсырып, ең жақсы нәтижемен грант конкурсына қатысуға болады - министрлік.
ҰБТ-ны екі рет тапсырып, ең жақсы нәтижені грант конкурсына өткізуге болады. Бұл туралы ҚР Ғылым және жоғары білім вице-министрі Қуаныш Ерғалиев мәлім етті, деп хабарлайды Almaty-akshamy.kz.
«ҰБТ жылына 5 рет өтеді. Ақылы негізде оқуға қатысты тестілеу қаңтар, наурыз, тамыз айларында қамтылады, ал грант конкурсына қатысу үшін мамыр-маусым айларында, яғни қазір өтіп жатқан негізгі ҰБТ нәтижесі қабылданады», - деді Қ. Ерғалиев Орталық коммуникациялар қызметіндегі баспасөз мәслихатында.
Оның айтуынша, биыл талапкерлер ҰБТ -ны 2 рет - қаңтар және наурыз айларында тапсырды. Қаңтардағы ҰБТ-ға 123 мың адам қатысып, оның 83%-ы шекті балл жинады. Наурыз айында 111 мың бала қатысып, оның 78%-ы шекті деңгейден өтті.
«Негізгі ҰБТ-ның маңызды артықшылығының бірі - оны тапсыруға екі мүмкіндік беріледі. Осы орайда тест тапсыратын бала ең жақсы нәтижені грант алу үшін конкурсқа жолдай алады. Биыл бұл норма заңнамалық тұрғыда бекітілді», - деді вице-министр.
Бұдан бұрын хабарланғандай, биыл 18 мамырда осы жылдағы негізгі ҰБТ басталды және ол 5 шілдеге дейін жалғасады.
Биылғы оқу жылына 88 мың грант бөлінді.