Алматы әкімі Бақытжан Сағынтаев жұмыс сапары кезінде Медеу ауданындағы жолдарды жөндеу және қоғамдық орындарды абаттандыру қарқынын тексерді, деп хабарлайды almaty-akshamy.kz
Екі шағынауданда инженерлік және жол инфрақұрылымы мәселелері толық дерлік шешілді. "Мұзтау" шағынауданында электр желілері жаңартылып, олар 6-дан 10 кВ-қа ауыстырылды. 17 шақырым су құбыры мен кәріз желісі тартылды, оған 274 үй қосылады. Бейсеуов көшесін жөндеу мен асфальттау жұмыстары аяқталуға жақын. Керей-Жәнібек хандар даңғылынан Іле Алатауы ұлттық табиғи паркінің экопостына дейінгі жолдың ұзындығы 4,6 шақырымды құрайды.
Бақытжан Сағынтаев 14,6 шақырымға жуық сумен жабдықтау және кәріз желілерінің құрылысы аяқталғаннан кейін жолдар қалпына келтіріліп жатқан "Көлсай" шағынауданында болды. Электр желілері қуатты желілерге дейін жаңартылды, бұл электрмен жабдықтау сенімділігін арттырды. 3,7 шақырым жолды қалпына келтіру жұмыстары жүргізіліп жатыр. «Балқаш» су қабылдағышынан "Көлсай" шағынауданына дейінгі магистральды желі салу бойынша жоба әзірленуде. 310 үй орналасқан 6 көшенің бойы жарықтандырылды.
Есентай өзенінің бойында су бөлгіштен бастап, Жамақаев көшесіне дейін денсаулыққа арналған жаяу жүргінші жолын салу жалғасып жатыр. Оның ұзындығы 4,2 шақырым. Жаңа Тереңқұр қазірдің өзінде тартымды орынға айналған. Сыртқы жарықтандыру тіректері және шағын сәулеттік пішіндер, соның ішінде қоқыс жәшіктері, орындықтар орнатылады. Мұнда балалар ойын және спорт алаңдары, жаяу жүргіншілер көпірлері мен қарау алаңдары болады. Сондай-ақ ұзындығы 6 шақырым болатын су бөлгіштен Медеуге дейін жаяу жүргіншілер аймағының құрылысын жалғастыру жобасы әзірленуде.
Омарова көшесінде Достық даңғылынан Көктөбеге дейін жаяу жүргіншілер аймағында жөндеу жұмыстары жүргізілуде. Сонымен қатар бұл жерде жолды орташа жөндеу жұмыстары жүргізілетін болады. Бақытжан Сағынтаев жол жөндеу және абаттандыру бойынша жұмыстардың сапасы мен мерзімін бақылауды тапсырды.
