Қазақстан Республикасы Оқу-ағарту министрлігінің баспасөз қызметінің мәлімдеуінше, еліміздегі балалардың әл-ауқат индексінің тұрақты өсімі тіркелді, деп хабарлайды aqshamnews.kz
Республикалық орташа мән 2,5 пунктке өсіп, 2023 жылғы 56,1 балмен салыстырғанда 58,6 балды құрады.
Сегіз өңір орташа көрсеткіштен асып түсті – 59,4-тен 64,6 балға дейін. Көшбасшы – Ақтөбе облысы, нәтижесі 64,6 балл, бұл өткен жылмен салыстырғанда 5,6 пунктке жоғары. Жоғары деңгейін Павлодар облысы да сақтап отыр – 63,3 балл. Айтарлықтай өсім Алматы қаласында (+6,9) және Қостанай облысында (+6,4) байқалды.
"Мемлекет басшысының тапсырмасы бойынша 2022 жылдан бастап Қазақстанда Балалар әл-ауқаты индексі енгізілді. Ол өңірлер арасындағы және халықаралық көрсеткіштермен салыстыруға мүмкіндік береді, сондай-ақ мемлекеттің және қоғамның назарын балалық шақ мәселелеріне аударады", – деді ҚР Оқу-ағарту министрлігінің Балалардың құқықтарын қорғау комитетінің төрайымы Насымжан Оспанова.
Индекс төрт бағыт бойынша 56 индикаторды қамтиды:
"Бала";
"Отбасы және қоғам";
"Мемлекеттік саясат";
"Елдің әл-ауқаты".
"Ол 35 статистикалық және 21 сауалнамалық көрсеткіш негізінде қалыптасады, олар баланың денсаулығы мен дамуын, отбасылық және әлеуметтік ортаны, сондай-ақ білім беру, денсаулық сақтау, әлеуметтік қорғау, экология және инфрақұрылым салаларындағы мемлекеттік саясаттың тиімділігін қамтиды", – делінген хабарламада.