Шымкент қаласының кәмелетке толмағандардың істері жөніндегі мамандандырылған ауданаралық соты жабық сот отырысында Ұлықбек Смановқа қатысты қылмыстық істі қарады, деп хабарлайды almaty-akshamy.kz
Қалалық соттың хабарлауынша, мамандандырылған ауданаралық сотта Қазақстан Республикасының Қылмыстық кодексінің 140-бабының 2-бөлігі (балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамау) және ҚК-нің 110-бабының 2-бөлігінің 1 және 2-тармақтары (азаптау) бойынша сотқа дейінгі тергеп-тексеру органының медициналық сипаттағы мәжбүрлеу шараларын қолдану туралы өтінішхаты қаралды.
Сот-психиатриялық сараптамасының қорытындысына сәйкес, Ұлықбек Сманов созылмалы психикалық аурумен ауырады және өз әрекеттерін жасау кезінде ес-түссіз жағдайда болған. Бұл жағдай заң бойынша қылмыстық жауапкершілікті жоққа шығарады. Сот Қазақстан Республикасының Қылмыстық кодексінің 16-бабына сәйкес, Ұлықбек Смановты қылмыстық жауапкершіліктен босатып, оны мамандандырылған психиатриялық стационарда емдеуге мәжбүрлеу шараларын тағайындады.
Сонымен қатар, Қазақстан Республикасы Оқу-ағарту министрлігіне, Астана, Алматы және Шымкент қалаларының білім басқармаларының қорғаншылық және қамқоршылық органдарына, сондай-ақ Шымкент қалалық полиция департаментіне балаларды психикалық аурумен ауыратын адамның қамқорлығына беру фактісі бойынша жеке қаулылар шығарылды.
Қаулы заңды күшіне енген жоқ.
Естеріңізге сала кетсе бұған дейін Шымкентте балаларға жауыздық танытқан емшінің қылмыстық өткен шағы жайында жазған едік.