Алматы қаласының Қылмыстық-атқару жүйесі департаментіне қарасты №11 мекемеде жазасын өтеуші жасөспірімдерге Халықаралық Нельсон Мандела күніне орай, «Азаптауларға және басқа да қатыгездікке, адамгершілікке жатпайтын немесе ар-намысты қорлайтын іс-әрекеттер мен жазалау түрлеріне қарсы Конвенция» жайында дәріс өтті.
Дәрісті Алматы қаласы Әділет депратаментің ресми өкілі Шынар Әзілбек және осы органның бас маманы Санат Нарымбаев жүргізді. Ал суретші Абдурахман Мұхтарұлы сурет салуға бейімі бар жазалы жасөспірімдерге сурет салудан шеберлік сабағын өткізді.
Дәрісте сотты болып, жазасаын өтеп жатқан жастарға Халықаралық Нельсон Мандела күнінің мән-мағынасы түсіндірілді. Бұл күнді БҰҰ Бас Ассамблеясы 2009 жылдың қарашасында бекіткен және жыл сайын 18 шілдеде Оңтүстік Африкадағы апартеидке (нәсілдік кемсітушілік) қарсы ең танымал күрескерлердің бірінің туған күнінде атап өтіледі.
– Балалар бұл күні сурет салып қана қоймай, өздері әрлеген қабырға газетіне арман-мақсатын, тілегін жазды. Әрине, түзеу мекемесінде отырған жасөспірімдердің бостандыққа шықсам, отбасыммен қауышсам, адам болсам деген тілегі орындалсын дейміз. Мұндай іс-шаралар оларды түзу жолға шақырады. Сондай-ақ, өз құқығын білуді үйретеді. Қатыгез болмауға, адамгершілікке жатпайтын немесе ар-намысты қорлайтын әрекеттерден аулақ болуға үндейді, – дейді САӘПТЖБ бастығының міндетін уақытша атқарушы әділет капитаны Шолпан Жарылқасова.