Алматы қаласындағы балалар колониясында 1 маусым - Халықаралық балаларды қорғау күні жыл сайын салтанатпен аталып өтілетін жарқын мереке.
Бұл - еліміздегі аяғын жаза басып, сотты болған жасөспірімдер тәрбиеленетін жалғыз мекеме. Қазіргі күні 49 бала жазасын өтеуде. Солардың ішінде аса ауыр қылмыс жасағаны - 34, ауыр қылмыс - 14, ауырлығы төмен қылмыс - 1.
Колония өкілдері ұйымдастырған мерекеге, яғни “Ашық есік күніне” жердің шалғайлығына қарамай әр тараптан балаларын құшағына алуға алып-ұшып жеткен ата-аналар мен жақындары қуанышты бүгін.
Салтанатты іс-шараға Алматы қаласы Жетісу ауданы әкімінің орынбасарлары қатысып, сөз сөйледі. Алматы қаласы Мәдениет басқармасына қарасты «Алматы әуендерінің» өнерпаздары ән-жырдан шашу шашты.
Жамбыл атындағы балалар мен жасөспірімдер кітапханасының мәдени іс-шара ұйымдастыру бөлімінің қызметкерлері де атсалысты. Домбырашы Ахмадиев Айбын, әнші Ахан Еркебұлан да балалар мен ата-аналарға мерекелік көңіл күй сыйлады.
“Біз балалар мен олардың ата-аналары үшін жылда осындай мереке ұйымдастырамыз. Үйін сағынып жүрген балалар да бір жасап қалады. Біз оларды қандай жағдайда да адамгершілік, мейірім, қайырым сынды адами қасиеттерден айырылмауға шақырып отырамыз”, - дейді мекеме бастығы әділет подполковнигі Мирас Толубаев.
“Ашық есік күні” колония ұжымы Алматы Орталық мешіті “Зекет” қайырымдылық қорының қолдауымен жазалы жасөспірімдерге меркелік дастархан жайды.