Алматы билігі әлеуметтік маңызы бар азық-түлік тауарларының бағасының өсуін тежеу мақсатында жұмыс істеп жатыр, деп хабарлайды aqshamnews.kz
2025 жылдың 9 айында ӘМАТ бағасының өсімі 8,4%-ды құрады, бұл орташа республикалық деңгейден (8,1%) сәл ғана жоғары.
Жағдайды тұрақтандыру үшін жергілікті бюджеттен 12 млрд теңге бөлініп, оның 8,3 млрд теңгесі өндірушілерден тікелей байланысып, Magnum сауда желісінде бағаны бекітуге жұмсалды. Өңірлік коммуникациялар қызметінде қала әкімінің орынбасары Олжас Смағұлов осылай деп хабарлады.
Оның айтуынша, әлеуметтік маңызы бар 19 түрлі тауар бойынша барлығы 26 мың тонна өнімге келісім-шарт жасалған. Алматыға өндірушілерден тікелей үлкен көлемде өнім үзбей жеткізіліп отырады. Сонымен қатар, қыс-көктем мезгілінде көкөніске байланысты ірі жеткізушілермен меморандумдарға қол қойылды. Қараша айынан бастап келер жылғы мамыр айына дейін 14 мың тоннадан астам өнім үлкен сауда желілеріне жол тартады. Бұл күн суық кезде тапшылық пен бағаның аяқ асты қымбаттап кетунің алдын алуға сеп болмақ.
«Біз үшін басым бағыт – әлеуметтік маңызы бар азық-түлік бағасы. Бұл әр отбасының күнкөрісіне тікелей әсер ететінін жақсы түсінеміз, сондықтан жүйелі ғана емес, жедел әрекет етеміз», – деп атап өтті Олжас Смағұлов.
Жергілікті және өңірлік өндірушілермен бірлесіп жүйелі жұмыс жүргізіліп жатыр, бұл делдалдарды айналып өтіп, алыпсатарлықты азайтады.
Мұндай тәсіл қаланың азық-түлік қауіпсіздігінің тұрақты жүйесін қалыптастырып, азық-түлікті арзандау бағамен жеткізіп отыруға мүмкіндік береді.
