Қазақстанда ауыл шаруашылығында еңбек етіп жүрген әйелдерге арналған «Lady Farmer» ұлттық байқауы ресми түрде бастау алды.
Бұл жоба агроөнеркәсіптік кешенде еңбек етіп жүрген немесе өз кәсібін дөңгелетіп отырған әйелдерді қолдауға және олардың еңбегін дәріптеуге бағытталған, деп хабарлайды aqshamnews.kz.
Ұйымдастырушылардың мәліметінше, байқауға жаңа кәсіп бастаған фермерлерден бастап ірі агрокәсіпорын жетекшілеріне дейін қатыса алады. Әсіресе инновациялық шешімдерді қолданып, шаруашылығын дамытып жүрген әйелдерге ерекше назар аударылады.
Ұлттық статистика комитетінің дерегінше, елімізде үш миллионнан астам ауыл тұрғыны - әйелдер. Олардың көпшілігі білім беру, денсаулық сақтау, сауда және ауыл шаруашылығы салаларында еңбек етеді. Сонымен қатар, әрбір төртінші фермерлік қожалық әйел адамның басшылығымен жұмыс істейді.
Байқау үш номинация бойынша өтеді:
• AgroQueen 2025
• Miss Green Energy
• Ауыл Girl Power
Жеңімпаздарды аграрлық БАҚ өкілдері мен танымал агроблогерлерден құралған қазылар алқасы анықтайды.
Финал мен марапаттау рәсімі 2025 жылғы 17 шілдеде «Jańa Dala / Green Day 2025» халықаралық көрмесі аясында өтеді.
Байқауды EXPO TIME компаниясы Ұлыбритания Елшілігінің қолдауымен ұйымдастырып отыр.