Алматы қаласының Әуезов ауданында рұқсатсыз тұрған сауда нүктелерін кезең-кезеңімен сүру жұмысы жүргізіліп жатыр. Өңірлік коммуникациялар қызметінде аудан әкімі Абзал Егембердиев осылай деп хабарлады.
Оның айтуынша, жыл басынан бері ауданда 114 бейстационарлық сауда нысаны мен рұқсат құжаты жоқ 53 силомер (күш өлшеу аппараты) бұзылған. Бұл жұмыс Жер ресурстарын басқару департаментімен бірлесе жүзеге асқан.
«Демонтаж жұмыстары басталар алдында меншік иелеріне аумақты босату қажеттігі туралы ескерту хаттары жіберіледі. Көп жағдайда кәсіпкерлер ескертуден кейін нысандарын өздері алып тастайды. Бас тартқан жағдайда, арнаулықызметтер оларды мәжбүрлеп бұзады», - дейді Абзал Егембердиев.
Бұзылған нысандардың қайта орнатылуына жол бермеу мақсатында аумақтарды тұрақты түрде бақылап, түсіндіру жұмыстары жүріп жатыр. Бұл іс-шаралар олардың құқықтық мәдениетін арттырып, белгіленген тәртіпті сақтауына бағытталған.
Аудан әкімдігінің мәліметінше, бұл жұмыс аудан аумағында тәртіпті, қолайлылық пен қауіпсіздікті қамтамасыз етуге, сондай-ақ заңды бизнесті дамыту үшін тең жағдай жасауға бағытталған.