Әлеуметтік желіде мектеп дәлізінде қолына балта ұстаған оқушының жүгіріп жүрген видеосы тарады. Полиция бұл оқиға 5 ақпанда Атырау облысы Құлсары қаласындағы мектептердің бірінде болғанын мәлімдеді, деп хабарлайды Aqshamnews.kz тілшісі.
Бейнежазбада балта ұстаған оқушы өзге бір оқушыны қуып жүргені, ал екінші оқушының сыныптардың біріне кіріп, есікті іштен бекіткені көрінеді. Атырау облыстық ПД дерегінше, 10-сынып оқушысы қатарластарымен жанжалдан кейін оларға шабуыл жасап, кейін мектеп аумағынан шығып кеткен.
Оқиға салдарынан екі оқушы жеңіл дене жарақатын алған. Шақырту түскен бойда полиция қызметкерлері жедел жетіп, күдікті жасөспірімді анықтап, ұстаған. Оқиғаға қатысушылар мен олардың ата-аналары полиция бөліміне жеткізілді.
Аталған факті бойынша бұзақылық дерегімен қылмыстық іс қозғалды. 15 жастағы күдікті уақытша ұстау изоляторына қамалып, ішкі істер органдарының есебіне алынды. Материалдар кәмелетке толмағандар ісі жөніндегі комиссияға жолданды.
Сондай-ақ ата-анасына кәмелетке толмағанды тәрбиелеу міндетін тиісінше орындамағаны үшін әкімшілік іс қозғалған. Қылмыстық іс аясында білім бөліміне қылмысқа ықпал еткен себептер мен жағдайларды жою туралы ұсыныс енгізілген. Тергеу қорытындысы бойынша білім ұйымының лауазымды тұлғалары мен оқу орнын күзеткен күзет агенттігі қызметкерлерінің әрекетіне құқықтық баға берілетіні хабарланды.