«Астана Арена» стадионында 9 желтоқсанда өтетін Чемпиондар лигасының «Қайрат» – «Олимпиакос» ойынына орай көрермендер үшін қосымша автобустар рейсі ұйымдастырылады, деп хабарлайды Аqshamnews.kz тілшісі.
Қала әкімдігінің мәліметінше, матч күні стадион бағытына шамамен 25 автобус шығады.
Автобустар мына тұрақтардан жүреді:
-
«Қалалық цирк» автотұрағы;
-
«Әзірет Сұлтан» мешітінің автотұрағы;
-
«Қазақстан» спорт кешенінің автотұрағы;
-
Орталық парк автотұрағы;
-
«Бас мешіт» автотұрағы.
Қоғамдық көлік сағат 18:00-де қозғалысты бастайды, стадионға дейін және кері бағытта қатынайды. Жанкүйерлерге жинақталу орындарына 17:30-ға дейін келу ұсынылып отыр.
Әкімдік дерегінше, матч барысында Астана қаласының полиция департаменті қауіпсіздік шараларын күшейтеді. Қоғамдық тәртіпті сақтау үшін шамамен 2800 полиция қызметкері, оның ішінде патрульдік жасақтар, учаскелік инспекторлар және кинологтар тартылады.
Сонымен қатар Қабанбай батыр даңғылы мен Тұран даңғылында көлік қозғалысына шектеу енгізілмейтіні атап өтілді.
Полиция тұрғындар мен қонақтарға қоғамдық тәртіпті бұзбауды, құқық қорғау органдары қызметкерлерінің талаптарын орындауды және матчқа қауіпсіз әрі қолайлы жету үшін ұйымдастырылған автобустарды пайдалануды ұсынады.