2025 жылғы 25 қарашада Астана қаласында (Қазақстан) «Әлем Әуені» халықаралық өнер фестивалі аясында Өнер музейінің салтанатты ашылу рәсімі өтті. Іс-шара Астана қаласы әкімдігі мен Түркі мәдениеті және мұрасы қорының бірлесіп ұйымдастыруымен өткізілді, - деп хабарлайды Aqshamnews.kz.
Салтанат барысында алғаш рет кең аудиторияға түркі әлемінің бай музыкалық және көркем мұрасын көрсететін экспонаттар, интерактивті аймақтар мен сирек кездесетін коллекциялар ұсынылды.
Ашылу аясында дүниежүзіне танымал шеберлер жасаған музыкалық аспаптарды ресми тапсыру рәсімі өтті. Ғасырлық дәстүрлер мен заманауи шеберлікті үйлестірген бұл аспаптар түркі музыкалық мәдениетінің алуан түрлілігі мен байлығын паш ететін бірегей өнер туындылары ретінде жоғары бағаланды.
Шара жалғасында «Түркі музыкалық аспаптары көрмесінің» ашылуы өтті. Экспонаттарда түркі халықтарының музыкалық аспаптарын жасауға қатысты тарихи, этнографиялық және эстетикалық мәліметтер ұсынылып, келушілерге бұл мұра туралы ғылыми әрі көрнекі түсінік алуға мүмкіндік берілді.
Күн бағдарламасына түркі әлемінің белгілі шеберлері өткізген шеберлік сағаттары да енгізілді. Сабақ барысында қатысушыларға аспап жасау үдерісінің қыр-сыры, орындау ерекшеліктері және дәстүрлі техникаларды сақтау жөнінде тәжірибелік білім ұсынылды.
Іс-шара Түркі мәдениеті және мұрасы қорының түркі әлемінің музыкалық мұрасын сақтау және насихаттау жолындағы жүйелі жұмыстары мен серіктес ұйымдармен жемісті ынтымақтастығының кезекті маңызды үлесі ретінде бағаланды.
