Астана жеңіл атлетикадан жабық кешендегі әлем чемпионатын қабылдайтын қала болып таңдалды. Бұл шешім Польшаның Торунь қаласында өткен World Athletics кеңесінің отырысында ресми түрде жарияланды, деп хабарлайды Aqshamnews.kz тілшісі.
Қазақстан астанасы 2030 жылы жеңіл атлетикадан жабық кешендегі әлем чемпионатын өткізеді. Әлемдік дода 15-17 наурыз аралығында өтеді. Бұл ақпарат World Athletics жарыстар күнтізбесінде де көрсетілген.
World Athletics кеңесінің Торуньдағы отырысында 2028 және 2030 жылдардағы бірқатар ірі турнирлердің қожайын елдері де белгілі болды. Атап айтқанда, 2028 жылғы жабық кешендегі әлем чемпионаты Үндістанның Одиша штатында өтеді.
Сондай-ақ халықаралық федерация 2028 жылғы спорттық жүрістен командалық әлем чемпионаты Қытайдың Хэфэй қаласында ұйымдастырылатынын жариялады.
Айта кетейік, Астанада бұған дейін де жеңіл атлетикадан ірі халықаралық жарыстар өткен. Атап айтқанда, 2023 жылы Азия чемпионаты ұйымдастырылса, 2024 және 2025 жылдары World Indoor Tour Gold сериясының кезеңдері қабылданды.