2026 жылғы 29 шілде мен 9 тамыз аралығында Астана қаласында халықаралық мультиспорттық "Болашақ ойындары" өтеді. Қазақстан үшінші рет ұйымдастырылатын бұл беделді турнирді қабылдайтын ел ретінде таңдалып, дайындық жұмыстары қазірдің өзінде жүйелі түрде басталып кетті, – деп хабарлайды aqshamnews.kz тілшісі.
Казань қаласында 2024 жылғы 21 ақпанда өткен "Болашақ ойындарының" ашылу салтанатында Мемлекет басшысы келесі ойындарды Қазақстан Республикасында өткізу туралы бастама көтерді. Бұл ұсыныс халықаралық спорт қауымдастығы тарапынан қолдау тауып, еліміздің турнирді қабылдауға ниетті екенін айқындады.
Осыдан кейін, 2024 жылғы 3 сәуірде Қазақстан Республикасының Үкіметі Мемлекет басшысына аталған Ойындарды өткізуге келісім беру туралы ресми сұрау салынған хат жолдады.
Ал 2024 жылғы 3 қазанда конкурстық іріктеу қорытындысы бойынша Қазақстан үшінші халықаралық "Болашақ ойындарын" өткізетін ел болып таңдалды. Бұл шешім Дубай қаласында өткен салтанатты рәсім барысында ресми түрде жарияланды.
Турнирді жоғары деңгейде ұйымдастыру мақсатында 2026 жылы Астана қаласында өтетін халықаралық мультиспорттық «Болашақ ойындарын» дайындау және өткізу жөніндегі арнайы ұйымдастыру комитеті құрылды. Ұйымдастыру комитетінің төрағасы болып Балаева А.Г. тағайындалды. Комитет құрамына мүдделі мемлекеттік органдардың бірінші басшылары енгізілген.
Сондай-ақ, ұйымдастыру комитетінің тапсырмасына сәйкес, 2026 жылы Астанада өтетін турнирді дайындау және өткізу үшін «Қазспортинвест» акционерлік қоғамының базасында арнайы дирекция құрылды.
2025 жылғы 20 мамырда турнирді дайындаудың 15 негізгі бағыты бойынша 102 іс-шараны қамтитын ұйымдастыру комитетінің жұмыс жоспары бекітіліп, оған қол қойылды. Бұл құжат жарысты ұйымдастырудағы негізгі қадамдарды нақтылайды.
Қазіргі жоспарға сәйкес, басты "Болашақ ойындары – 2026" турнирі 2026 жылғы 29 шілде мен 9 тамыз аралығында Астана қаласында өтеді. Жарыстарға әлемнің 100-ден астам елінен қатысушылар келеді деп күтілуде. Турнирдің жалпы ұзақтығы 12 күнге созылады.
Жарыс бағдарламасына цифрлық және физикалық кезеңдерді біріктіретін 8 фиджитал пәні енгізілген. Ал турнирдің жалпы жүлде қоры 5 миллион АҚШ долларын құрайды.
Астана төрінде өтетін бұл дода Қазақстанның халықаралық спорт аренасындағы беделін арттырып қана қоймай, жаңа форматтағы жарыстарды ұйымдастырудағы әлеуетін де көрсетуге мүмкіндік береді.