Бұл туралы Жарлыққа Мемлекет басшысы биылғы жылдың 4 наурызында қол қойған болатын.
Барлық гарнизондарда әскери қызметшілердің Жауынгерлік тумен қоштасу рәсімдері өтіп жатыр, деп хабарлайды Almaty-akshamy.kz ҚР ҚМ баспасөз қызметіне сілтеме жасап.
Қазақстанның Қарулы Күштерінде мерзімді әскери қызметін өткерген 6 000-нан астам әскери қызметшіні запасқа шығару басталды. Отан алдындағы міндетін абыройлы атқарған сарбаздарға командирлері алғыс айтып, үйлеріне салтанатты түрде шығарып салып жатыр.
Ел Президенті Қасым-Жомарт Тоқаевтың тапсырмасына сәйкес, көптеген әскерилер әскерде экономиканың нақты секторында қажет жұмысшы мамандықтарын меңгерді. Запасқа шығарылатын сарбаздардың көбі 2022 жылдың қаңтарында төтенше жағдай режимін қамтамасыз ету шараларына тартылды.
Әскери бөлімдердің командирлері атап өткендей, бір жыл ішінде мерзімді қызметтегі сарбаздар шынығып, әскери мамандықтарды меңгерді. Жауынгерлік даярлықта жоғары нәтижелерге қол жеткізіп, мұны бірнеше мәрте іс жүзінде көрсете білді.
Оқу-жауынгерлік тапсырмаларды сапалы орындағаны және қызметтегі жетістіктері үшін ерекшеленген әскери қызметшілер алғыс хаттармен, грамоталармен және әскери бөлімнің Жауынгерлік туының жанында түскен фотосуреттермен марапатталды.
Запасқа шығарылғаннан кейін сарбаздар әскери-оқытылған резерв ретінде тұрғылықты жері бойынша жергілікті әскери басқару органдарында есепке қойылады.