Биылғы Ант қабылдау рәсімі бүкіл ел болып ұлықтап жатқан Ұлы Жеңістің 80 жылдығымен қатар келіп отыр. Сондықтан көктем айында шекарашылар сапына алынған жас сарбаздар үшін бүгінгі шараның маңызы ерекше.
ҰҚК Шекара қызметі Алматы облысы бойынша департаментінің оқу базасында өткен рәсімде 500-ге жуық жас сарбаз Отанына адал қызмет етуге салтанатты түрде серт берді. «Сарбаз болдым, мінеки» демекші, осы сәттен бастап Отан қорғаушылардың қатарына қосылған жас сарбаздардың өміріндегі ең сәулелі кезеңге куә болу үшін алыстан ата-аналары, туған-туыстары мен достары арнайы келді. Атап өтерлігі, сап түзеген сарбаздар еліміздің барлық өңірлерінен әскерге шақырылған.
Шараға «Генералдар кеңесі» республикалық қоғамдық бірлестігі Президиумының төрағасы, отставкадағы генерал-лейтенант Бексұлтан Сәрсеков, Шекара қызметінің ардагері, әскери ғылымдар докторы, профессор, Қазақстан Республикасы Әскери ғылымдар академиясының академигі, отставкадағы генерал-майор Шынтас Өтепов, сондай-ақ Наурызбай ауданының құзырлы органдарының өкілдері қатысты.
Еліміздің Мемлекеттік Әнұраны шырқалғаннан кейін Ант қабылдау рәсімі басталды. Сарбаздардың біркелкі жүрістері мен қимылдары олардың әскери тәртіпке бой үйретіп, темірдей тәртіпке қалыптасып үлгергенін аңғартты.
Сарбаздар департамент бастығы, полковник Әлібек Амангелдіұлы Каюпов пен ардагер сардарлардың алдында ант берді. Рәсімнің келесі бөлімінде – нағыз шекарашыға айналған сарбаздарды құттықтау сәті өтті. Қонақтар жас сарбаздарға алдағы қызметтеріне сәттілік тілеп, ақ баталарын берді.
Шара барысында полковник Әлібек Каюпов «Срочник 2.0» бағдарламасы аясында «Көктем–2024» шақырылымында үздік шыққан жеті сарбазға сертификат табыстады. Бұл құжаттар сарбаздардың өздері қалаған жоғары оқу орындарына түсулеріне мүмкіндік береді. Полковник олардың Отан алдындағы қызметіне алғыс білдірді.
Шекарашылардың кез келген шарасы департаменттің сайыпқырандары қатысатын ерекше көріністермен жалғасатыны белгілі. Бұл жолы да олар қоян-қолтық ұрыстың және шекара бұзушыны құрықтау тәсілдерінің әдіс-амалдарын көпшілікке шебер көрсетті. Сонымен қатар, Шекара қызметі Қызметтік кинология басқармасының мамандары ұлттық мақтанышымызға айналған тазы мен төбетті ортаға шығарып, олардың ерекше дайындығын паш етті.
Сондай-ақ, жиналған жұрт сарбаздардың ата-аналары мен бауырлары алдында сап түзеп өткен атбегілер мен олардың қызмет аттарының өнерін тамашалады.
Шара соңында департаменттің жауапты тұлғалары ата-аналармен жүздесіп, көпшілікті мазалаған сұрақтарға тұшымды жауап берді.