Алматы қаласының күніне орай Абай атындағы Қазақ ұлттық опера және балет театры көне классика мен заманауи сахнаның тоғысқан әлемін паш ететін «Мұра» атты гала-концертін ұсынады. Бұл шара театрдың 91-ші маусымының ашылуы аясында өтеді және қала тұрғындарына ерекше әсер қалдыратын жарық шоуымен ұмытылмас кеш сыйламақ. Гала-концерт 15 қыркүйек күні сағат 19:00-де театр алаңында өтеді, деп хабарлайды aqshamnews.kz
Бұл кеште өнерсүйер қауымды Қазақстанның халық әртісі Нұржамал Үсенбаева, Қазақстанның еңбек сіңірген қайраткерлері Жәмиля Баспақова мен Гүлзат Дәуірбаева, «Құрмет» орденінің иегері Зарина Алтынбаева, халықаралық байқаулардың жеңімпаздары Нұржан Бажекенов, Фархад Кубиев пен Венера Алпыспаева және театрдың басқа да жұлдыздары өз шеберліктерімен қуантады. Гала-концерттің дирижері — Қазақстанның еңбек сіңірген қайраткері Нұржан Байбосынов.
Абай атындағы Қазақ ұлттық опера және балет театрының алаңы бұрын-соңды болмаған үлкен сахнаға айналады. Концерт бағдарламасы үздік опера және балет қойылымдарының көріністерімен толықтырылады. Қозғалмалы сахнада көрермендерге сүйікті әндер мен билерден шашу шашылады. Жан тебірентер гала-концерт арқылы асқақ өнердің алтын мұрасы қала тұрғындарына тарту етіледі.
Абай театры еліміздегі ең үлкен өнер ошағы ретінде өз миссиясын мақтанышпен жалғастырып келеді. «Басты мақсатымыз — 90 жылдан астам тарихы бар киелі сахна майталмандарының шеберлігін өскелең ұрпаққа насихаттап, жылдар бойы қалыптасқан әдемі дәстүрді заман ағымына сай жаңартып, көрермендермен байланысты одан әрі нығайту», — деп атап өтті Абай атындағы ҚазҰОБТ директоры Айнұр Көпбасарова.
Театр ұжымы жаңа маусымын әсем әуендер мен көз тартарлық шоумен бастамақ. Жарық шоуын қою үшін беделді «Золотая маска» театр сыйлығының иегері, халықаралық жобалардың қатысушысы, танымал жарық қоюшы суретші Татьяна Мишина шақырылды. Абай атындағы театрдың шығармашылық ұжымы барша Алматы тұрғындары мен қонақтарын осы ерекше кешке шақырады.
Мекенжайы: Абай атындағы Қазақ ұлттық опера және балет театры, Алматы қ., Қабанбай батыр көш., 110. Театр алаңы.