Теңіз жаяу әскерлері бригадасының 500-ден астам сарбазы Жауынгерлік тумен қоштасты.
Атырау облысындағы су тасқыны салдарын жоюға қатысқан 300-ден астам сарбаз Қорғаныс министрінің атынан қол сағаттарымен марапатталды. Қызметтік міндеттерін адал атқарғаны және үлгілі әскери тәртібі үшін бірқатар әскери қызметшілердің ата-аналарына алғыс хаттар жолданды. Жекелеген сарбаздарға кезекті әскери атақ беру де маңызды сәт болды, деп хабарлайды aqshamnews.kz Қорғаныс министрлігіне сілтеме жасап.
Теңіз жаяу әскерлері бригадасының командирі подполковник Азамат Сүлейменов бір жыл ішінде әскери қызметшілердің әскери мамандықты меңгергенін, олардың көпшілігі жауынгерлік және мемлекеттік-құқықтық дайындықта тамаша нәтижеге қол жеткізгенін атап өтті.
– Сіздер «Бірлестік-2024» халықаралық оқу-жаттығуларына, көктемгі су тасқыны салдарын жоюға қатыстыңыздар. Азаматтардың қауіпсіздігін қамтамасыз етуге, оларды эвакуациялауды ұйымдастыруға және гуманитарлық көмек жеткізуге өз үлестеріңізді қоса білдіңіздер, – деді бригада командирі.
Қатардағы жауынгер Бейбарыс Сейітқасым әскердегібір жылғы қызметі туралы өз әсерін ортаға салуды да ұмытпады.
– Әскер бізге көп нәрсені үйретті. Командирлерге зейіні мен шыдамдылығы, әскери істі игеруге көмектескені үшін алғыс айтқым келеді. Біз мұны ешқашан ұмытпаймыз әрі жоғары бағалаймыз, – деді ол.
Сонымен бірге 37 теңіз жаяу әскерінің келісімшарт бойынша қызмет етуге шешім қабылдағанын да айта кету керек. Запасқа шығарылған 60-тан астам әскери қызметші білім беру жеңілдіктерін пайдалануға және жоғары оқу орнына оқуға түсуге ниет білдірді.