АҚШ-тың барлық 50 штатында Дональд Трамп әкімшілігінің саясатына қарсы «No Kings» ұранымен жаппай наразылық акциялары өтті, деп хабарлайды Aqshamnews.kz тілшісі.
Reuters мәліметінше, ел бойынша 3200-ден астам шеру ұйымдастырылған. Ал бірқатар басылымдар акциялар саны 3300-ден асқанын, оған миллиондаған адам қатысқанын жазды. Кей деректерде қатысушылар саны 8 миллионға жуық деп бағаланған.
Наразылық білдірушілер президент билігінің шамадан тыс күшеюіне, көші-қон саясатының қатаюына және АҚШ-тың қазіргі сыртқы саяси қадамдарына қарсылық танытты. Ірі шерулер Нью-Йорк, Вашингтон, Даллас және басқа да қалаларда өтті. Сарапшылар бұл толқуды соңғы жылдардағы ең ауқымды азаматтық белсенділіктің бірі ретінде бағалап отыр.
Наразылықтың басты ошақтарының бірі Миннесота болды. Reuters бұл штаттағы ашу-ызаға иммиграциялық қызметке байланысты екі азаматтық өлім оқиғасынан кейінгі қоғамдық реакция түрткі болғанын жазады. Ал Сент-Полдағы ірі жиында музыкант Брюс Спрингстин сөз сөйлеп, акцияны азаматтық қоғамның күшімен байланыстырды.
«No Kings» қозғалысына шетелдегі қолдау акциялары да қосылды. Шерулер мен ынтымақтастық митингілері Париж, Лондон және басқа да қалаларда өтті.