Лос-Анджелестегі алқабилер соты 20 жастағы қыздың психикалық денсаулығына келтірілген зиян үшін Meta мен Google-ды жауапты деп танып, оған жалпы 6 миллион доллар өтемақы төлеуді міндеттеді. Бұл іс әлеуметтік желі платформаларының тәуелділік тудыратын алгоритмдеріне қатысты алғашқы ірі үкімдердің бірі саналады, – деп хабарлайды aqshamnews.kz тілшісі.
АҚШ-та әлеуметтік желілердің жасөспірімдерге әсеріне қатысты тарихи шешім шықты. Лос-Анджелестегі сот 20 жастағы талапкердің психикалық денсаулығына келген зиян үшін Meta мен Google компанияларын кінәлі деп таныды. Алқабилер шешімі бойынша, екі компания оған 3 миллион доллар өтемақы және 3 миллион доллар айыппұл сипатындағы өтемақы төлеуі тиіс. Оның 70 пайызы Meta-ға жүктелген.
Іс материалдарына сәйкес, бойжеткен YouTube-ті кішкентай кезінен, Instagram-ды бастауыш жастан бері қолданған. Сот барысында оның әлеуметтік желіге шектен тыс байланып қалғаны, соның салдарынан депрессия, мазасыздық және өз келбетіне қатысты психологиялық қиындықтар күшейгені айтылды.
Бұл үкімнің маңызы зор, себебі алқабилер алғаш рет әлеуметтік желі сервистерін балалар мен жасөспірімдерді өзіне байлап қоятындай етіп жасалған «ақаулы өнім» ретінде қарастыруға болатынын көрсетті. Іс шамамен екі мыңнан астам ұқсас талап-арызға жол ашатын сынақ ісі ретінде бағаланып отыр.