Қазақстан Республикасының Сауда және интеграция министрлігі АҚШ-тың Қытайдан келетін тауарларға салатын салықтарын арттыруы еліміздің экономикасына теріс әсер етпейді деп күтіп отыр, әрі Қытай тауарларының көптеп кіруі жайлы алаңдаушылық жоқ, деп хабарлайды aqshamnews.kz
"Қытай түрлі тауарлардың үлкен көлемін өндіреді. АҚШ-тағы Қытай тауарларына деген сұраныс Қазақстандағы сұраныстан ерекшеленеді. Яғни, тұтынушылық сұраныс пен нарықтың талғамы әртүрлі. Сондықтан тауарлардың көптеп кіруі күтілмейді. Қазақстанға ықпал ету тек транзиттік ағындарда болуы мүмкін, себебі Қытай Еуропаға экспортын арттырып, АҚШ-пен тікелей сауда кедергілерінен аулақ болуға тырысады", – деді Сауда және интеграция вице-министрі Қайрат Төребаев.
Дегенмен, экономистер бұл мәселеге оң көзқараспен қарамайды. Экономист Ғалымжан Айтқазиннің пікірінше, Қытай тауарларының қымбаттауы әлемдік деңгейде инфляциялық қысымды күшейтуі мүмкін және бұл Қазақстан экономикасына да кері әсерін тигізуі мүмкін.
"Менің ойымша, АҚШ-тың Қытайға 20% салық енгізуі Қытай экономикасының бәсеңдеуіне әкеліп, бұл өз кезегінде мұнай, металдар және уранға деген сұранысты төмендетуі мүмкін. Ал Қазақстанның шикізат экспортына жоғары тәуелділігі еліміздің экспорттық кірістерінің төмендеуіне әсер етеді. Сонымен қатар, шикізат бағасының өзгеруі валюталық курстың құбылуына алып келуі мүмкін", – деп атап өтті ол.