Ақмола облысында бүйрегін 25 мың АҚШ долларына заңсыз сатпақ болған азамат ұсталды, – деп хабарлайды aqshamnews.kz тілшісі Ақмола облысы полиция департаментіне сілтеме жасап.
Полицияның мәліметінше, ұйымдасқан қылмысқа қарсы күрес басқармасының қызметкерлері әлеуметтік желіде өз ағзасын сатуға ниет білдірген хабарландыру жариялаған Алматы облысының тұрғынын анықтаған.
Жедел шаралар кезінде күдікті Көкшетауда ақша алып жатқан сәтінде қолға түсті. Тергеу дерегіне сүйенсек, ол бұған дейін де осындай мазмұндағы хабарландыруларды бірнеше рет жариялаған.
Ұстау барысында тәртіп сақшылары қолма-қол ақшаны, ұялы телефонды, сондай-ақ медициналық анықтамалар мен талдау құжаттарын тәркілеген. Қазір аталған дерек бойынша қылмыстық іс қозғалып, барлық мән-жай тексеріліп жатыр.
Айта кетейік, бұған дейін ағзасын 13 млн теңгеге сатпақ болған тұрғынға қатысты сот шешімі шыққан еді.