Мектебімізде «БАЛАNEWS.KZ» журналының тұсаукесер салтанаты өтті. Салтанатты шараның құрметті қонағы – Қазақстан Журналистер одағының мүшесі, «Ақ желкен» журналының бас редакторы Есей Жеңісұлы болды. Тұсаукесер рәсімінде дәстүр бойынша №202 мектеп-гимназия директоры Болат Жанайхан сөз сөйлеп, Есей Жеңісұлымен бірге қызыл лентаны қиды. Қуанышқа арналған шашу шашылып, ақ баталар берілді.
Редакция алқасының мақсаты – журнал арқылы мектеп оқушыларының шығармашылық қабілетін, отансүйгіштік сезімін, әсемдікке деген құмарлығын дамыту. Мектебімізде көптеген талантты жеткіншектер бар, солардың жазған-сызған туындылары, ғылыми-зерттеу еңбектері, құрастырған дамыту ойындары, тіпті ерекше әзілдері де газет бетінде жарияланады. «БАЛАNEWS.KZ» балаларды дәстүрлі құндылықтарға – үлкенді сыйлауға, мектеп пен ұстазды құрметтеуге, кішіге қамқор болуға, ең бастысы, қоғамның ең үлкен байлығы – адам екенін түсінуге шақырады.
Алматы қаласының мектептерінде өз басылымдарын шығару үрдісі біраздан бері жалғасып келеді. Қала бойынша үш мектепте ғана өз төл басылымы бар, олардың қатарына енді «БАЛАNEWS.KZ» журналы да қосылды.
«БАЛАNEWS.KZ» журналына алар асулары, бағындырар белестері көп болсын! Биіктерден көріне бер!