Банкир болып, полицей болып, жұртты алдап болған алаяқтар енді медик ретінде төбе көрсете бастапты.
Мұндай фактілер барын «Мемлекеттік техникалық қызмет» АҚ мамандары растап отыр, деп хабарлайды aqshamnews.kz
Сізге клиниканың тіркеу бөлімінен деп қоңырау шалады. Олар сіздің үйіңіздің адресіне дейін біліп тұрады. Сосын: «Енді дәрігердің қабылдауы мен жедел жәрдем шақыру — ЖСН (ИИН) бойынша емес, медициналық декларация нөмірі арқылы жүргізіледі. Сізге қазір «декларация нөмірі» келуі керек, соны айтыңыз, бір тіркеп қоямыз...»
Ал, іс жүзінде ол — DamuMed немесе eGov сияқты мемлекеттік өтінімдерді енгізуге арналған бір реттік код. SMS түрінде келген 6 таңбалы кодты айтып берген адам алаяқтарға жеке кабинетін ашып береді.
Сондықтан, телефонмен өзін кім деп таныстырса да, SMS-кодты ешкімге бермеу керек. ЖСН сұраса, айтпаған дұрыс. Сақ боларсыз.