Мемлекеттік кірістер комитетінің дерегінше, 2022 жылдың 1 қаңтарынан бастап Қазақстанда интернет арқылы тауар ұсынатын немесе электронды қызмет көрсететін шетелдік компанияларға қатысты жаңа салық тетігі енгізілген, деп хабарлайды Aqshamnews.kz тілшісі.
Көпшілікке «Google салығы» ретінде белгілі бұл механизм шетелдік платформаларды Қазақстанда тіркелуге және 12% мөлшерлемемен қосылған құн салығын төлеуге міндеттейді.
Қазіргі таңда елімізде 118 шетелдік компания тіркелген. Олардың қатарында Apple, Microsoft, OpenAI, Canva, Valve және Temu секілді әлемдік алпауыт брендтер бар. 2025 жылдың өзінде Chess.com, Canyon Bicycles GmbH және тағы 20 компания тізімге қосылған.
Комитеттің мәліметінше, жаңа жүйе күшіне енгеннен бері шетелдік интернет-платформалар Қазақстан бюджетіне 118,4 млрд теңге аударған. Оның 48,6 млрд теңгесі 2025 жылдағы түсім, бұл өткен жылдың сәйкес кезеңімен салыстырғанда 20 млрд теңгеге артық.
2025 жылы ең ірі салық төлеушілердің алғашқы үштігіне Valve Corporation (8,6 млрд тг), Apple (8 млрд тг) және Temu (6,2 млрд тг) кірген.
Ведомство Қазақстан енгізген бұл модель ЭЫДҰ ұсынымдарына сәйкес келетінін және әлемдік тәжірибеге толық сай екенін атап өтті. Осындай цифрлық салықтар Еуропалық одақ елдерінде, Ұлыбританияда, Канадада, Үндістанда, Жапония мен Австралияда да қолданылады.
Комитет өкілдері «цифрлық ҚҚС» енгізу бір жағынан мемлекеттік бюджеттің кірісін ұлғайтса, екінші жағынан отандық IT-компаниялар үшін тең бәсекелестік алаң қалыптастырып, цифрлық қызметтер нарығында ашықтық пен әділдікті арттырғанын жеткізді.