Алматыдан оңтүстік-батысқа қарай шамамен 300 шақырым жерде жер сілкінісі тіркелді. Зілзаланың ошағы Қырғызстан аумағында орналасқан, деп хабарлайды Aqshamnews.kz тілшісі.
Қырғызстан Ұлттық ғылым академиясы Сейсмология институтының мәліметінше, жерасты дүмпуі 24 мамыр күні жергілікті уақытпен сағат 9:50-де болған.
Зілзала ошағы Қырғызстан аумағында, Байбиче ауылынан солтүстік-шығысқа қарай 13 шақырым, Манас қаласынан оңтүстік-шығысқа қарай 95 шақырым жерде орналасқан. Бұл Алматыдан оңтүстік-батысқа қарай шамамен 300–350 шақырым қашықтық.
Байбиче және Қара-Дөбе ауылдарында жер сілкінісінің күші 2 балл болып сезілген.
Қазақстан аумағында жерасты дүмпуі сезілгені туралы ақпарат түскен жоқ. Бұған дейін Қазақстан сейсмологтары Қырғызстан мен Қытай шекарасына жақын аймақта магнитудасы 4,8 және 4,5 болатын екі жер сілкінісін, ал 20 мамырға қараған түні Өзбекстан аумағындағы зілзаланы тіркеген еді.