Алматылық «Қайраттың» бұрынғы шабуылшысы әрі капитаны Сергей Рожковтың қайтыс болғаны белгілі болды. Қазақстан футболының ардагері 84 жасқа қараған шағында өмірден өтті, деп хабарлайды Aqshamnews.kz тілшісі.
Қайғылы хабар алматылық клубтың әлеуметтік желідегі парақшасында жарияланды. «Қайрат» клубы Сергей Егоровичтің туған-туыстарына, жақындарына, достарына, бұрынғы әріптестеріне және оны таныған барша жанға көңіл айтты.
Клуб мәліметінше, Сергей Рожков «Қайрат» сапында 1966–1967, 1970–1973 және 1975–1976 жылдары өнер көрсеткен. Алматы клубы құрамында 203 матч өткізіп, 25 гол соққан. Ол команда капитаны болды және өз буынының ең жарқын өкілдерінің бірі саналды.
1971 жылы Сергей Рожков «Қайратпен» бірге Теміржолшылар халықаралық спорт одағы кубогын жеңіп алды.
Рожков КСРО спорт шебері болған. Сондай-ақ ел чемпионы және ел кубогының екі дүркін иегері атанды. Оның еншісінде ұлттық құрама сапындағы екі матч бар.