Шымкентте салмағы 7 келіге жуық алып сәби дүниеге келді.
Шымкент қалалық №2 аурухана перзентханасында алып сәби дүниеге келді, деп хабарлайды aqshamnews.kz қалалық денсаулық сақтау басқармасының мәліметіне сілтеме жасап.
41 жастағы әйел 6 700 грамм салмақтағы ер баланы өзі табиғи жолмен, ешқандай асқынусыз өмірге әкелді. Бұл елімізде сирек кездесетін жағдай, дейді дәрігерлер. Алып бала отбасындағы алтыншы перзент болып отыр. Көп балалы ана бұған дейін дүниеге төрт ұл, бір қыз әкелген.
"Қазіргі таңда ананың да, баланың да жағдайы жақсы. Таңғаларлығы алып баланы анасы өзі босанды. Ота да, күрделі араласу да қажет болмады", - дейді дәрігерлер.
Айта кетейік, жыл басынан бері Шымкентте 6719 сәби дүниеге келген. Оның ішінде 3271 қыз, 3448 ұл бала.