Ескерткіш былтыр ашылған
Алматы әкімдігі былтыр Ыбырай Алтынсаринге орнатылған ескерткіш параметрлерінің сәйкес келмеуіне қатысты мәселеге түсінік берді, деп хабарлайды Almaty-akshamy.kz.
«Бұл Алматы қаласындағы 2021 жылда салынған 68 750 000 тг тұратын бабамыздың ескерткіші. Құжат бойынша биіктігі 750 см, шын мәнінде – 527 см. 223 см айырмашылықты ақшамен санасақ қанша болады екен?», - деп жазды Facebook-парақшасында «Әділдік жолы» республикалық қоғамдық бірлестігінің атқарушы директоры Дидар Смағұлов.
Оның айтуынша, ескерткіш тұғырының биіктігі 350 см, ал шын мәнінде – 177 см. Ескерткіштің өзі 400 см болуы тиіс, өлшегенде – 350 см.
«Айырмашылық небәрі 223 см болғанымен, материалдардың, соның ішінде көркемдік үшін қолданылатын OЦС-545 маркалы қоланың қымбаттығын ескерер болсақ, теориялық тұрғыда лайықты сома шығып тұр», - деп жазды ол.
Осыған байланысты ҚазАқпарат агенттігі қала әкімдігіне сауал жолдаған болатын.
Мынандай жауап алдық: «Ескерткіш ҚР Мәдениет және спорт министрінің 2020 жылғы 28 сәуірдегі № 103 бұйрығымен бекітілген монументалды өнер ғимараттарын орнату қағидаларына сәйкес орнатылды.
2021 жылғы 12 тамызда ҚР Мәдениет және спорт министрлігінің монументалды өнер ғимараттарын орнату жөніндегі комиссиясының отырысында 3 эскиздік жоба қаралды. Нәтижесінде ескерткіштің эстетикалық келбеті туралы кейбір ескертулермен № 112200 эскиздік жоба мақұлданды.
Жоғарыда көрсетілген ескертулерді назарға ала отырып, 2021 жылдың қыркүйегінде Алматы қаласының Тарих және мәдениет ескерткіштерін қорғау жөніндегі комиссия Ы. Алтынсаринге орнатылған ескерткіш жанында көшпелі кеңес өткізді. Ескерткіштің ауқымы ғимараттың биіктігіне сәйкес келмеуі салдарынан тұғырдың көлемін 350 см-ден 165 см-ге қысқарту туралы комиссиялық шешім қабылданды. Бұл шешім көшпелі кеңестің хаттамасында тіркелген. Яғни, ескерткіштің биіктігі өзгерген жоқ, тұғыр қысқарды.
Әлеуметтік желілерде ескерткіштің биіктігі 350 см, ал тұғырдың биіктігі 177 см екендігі көрсетілген. Ескерткішті дайындау мен орнатуды «Aspantau Construstion» ЖШС жүзеге асырды.
Авторлардың ақпаратына сәйкес, ескерткіш техникалық сипаттамаға сәйкес OCS 545 маркалы қоладан жасалған. Тұғырдың биіктігі 165 см, ал фигуралар оның ажырамас бөлігі болып табылатын подиумды қосқанда 400 см.
Бастапқы критерийлер бойынша дайындалған тұғыр комиссияның шешімімен қысқарғаннан кейін қалған материал (тас) одан әрі пайдалануға жарамсыз болып шықты және әлі күнге дейін «Aspantau Construstion» ЖШС аумағында сақтаулы.
«Алматы қаласының мәдениет басқармасы бүгін ескерткішті бақылау өлшеуін жүргізіп, ғимарат авторлары көрсеткен параметрлерді растады».
Еске салайық, былтырғы 30 желтоқсанда Алматы қаласында көрнекті ағартушы-педагог, жазушы, этнограф, қоғам қайраткері Ы. Алтынсаринге ескерткіш орнатылған болатын.