«Алтын Орда» базары цифрландырылды, деп хабарлады Сауда және интеграция министрлігі.
Сауда комитеті «Алтын орда» базарының әкімшілігімен бірлесіп, базар жұмысының ашықтығын қамтамасыз ету үшін бірлескен іс-шаралар жоспарын бекітті. Оның шеңберінде 2023 жылғы желтоқсаннан бастап, базардың кіреберісіне 6 QR-коды бар автоматты шлагбаум мен кіру ақысын төлеу үшін павильондарда 6 POS-терминал орнатылды.
Сондай-ақ «Алтын Орда» базарын цифрландыру бойынша altynordaresmi.kz сайты іске қосылды.
Онда азаматтарға қолжетімді сауда орындарының саны, олардың алаңы, жалдау құны туралы ақпарат, жалдау (пайдалану) шартының талабы, оны бұзу тәртібі мен негізі туралы мәлімет көрсетілген. Базар басшылығы тарапынан кері байланыс болу үшін онлайн-шағым беру және ұсыныс енгізу мүмкіндігі енгізілді.
Жоғарыда аталған іс-шаралар базар қызметінің ашықтығын қамтамасыз етуге, бюджетке салық төлемдерінің түсімдерін ұлғайтуға мүмкіндік береді, - деп жазылған хабарламада.
Естеріңізге сала кетейік, 2023 жылдың тамызында Сауда және интеграция министрі Арман Шаққалиев анықталған бұзушылықтарды жою, нарықты жаңғырту және фермерлер үшін тегін сауда орындарын ұсыну жөніндегі жұмысты үйлестіру үшін базар аумағында мобильді топтың қатысуымен кеңейтілген кеңес өткізді.
2023 жылғы желтоқсанда Сауда Комитетінің төрағасы Айдар Әбілдабеков «Алтын Орда» базарына барып, базар әкімшілігімен сауда алаңдарын жаңғырту мәселелерін талқылады. Кеңес қорытындысы бойынша Айдар Әбілдабеков қысқа мерзімде бизнес-процестерді цифрландыруға көшуді жеделдетуді тапсырды.