«Алтын микрофон» фестивалі - таланттарды шыңдаған өнер бәйгесі
Байқаудың шешуші кезеңінде еліміздің әр өңірінен және алыс-жақын шет елдерден келген жас әншілер өнер көрсетті, деп хабарлайды Almaty-akshamy.kz
Белгілі әнші Бейбіт Сейдоллаұлы төрағалық еткен қазылар алқасының құрамында Армения, Болгария, Қырғызстан, Белоруссия, Украина мемлекеттерінің білікті мамандары болды. Олардың әрқайсысы өздерімен бірге енді қалыптасып келе жатқан ең дарынды деген таңдаулы бір-екі әншіден ерте келіп, Тобыл өңіріндегі өнер байқауына қосты. Биылғы «Алтын микрофонның» деңгейі жоғары болды.
Кезінде «Славян базарында» топ жарған Ернар Садырбаев осы байқаудан өсіп шыққан. Бүгінгі Абай атындағы мемлекеттік академиялық опера және балет театрының белді солисі Балуан Беркенов те - осы «Алтын микрофон» фестивалінен өсіп шыққан әнші.
Байқаудың бастапқы кезеңдері онлайн түрде өтті. Финалдық бәсекеге осы іріктеуден өтіп, жүзден жүйрік шыққан 41 өнерпаз қатысты. Олар жас ерекшеліктеріне қарай кіші, орта, ересек және кәсіпқой топқа бөлініп, әрқайсысы екі-екі әннен орындап шықты.
Фестиваль жеңімпаздары қазылар алқасының қалауы бойынша анықталды. 7-10 жас аралығындағы балғындар ішінен Алсу Ұлтуғанова бірінші орынды жеңіп алды. Ал 11-13 жас аралығындағы қатысушылар арасынан қостанайлық Ясмина Аюпова, 14-17 жас аралығындағы өнерпаздардың ішінен Дария Матвеева үздік шықты.
«Кәсіпқойлар» тобы бойынша 1-орынды қостанайлық жас әнші Алмат Жаңабай жеңіп алды. 2-орынға түркиялық Волкан Талшык лайық деп танылды. Ал Гран-При сыйлығын Нұр-Сұлтан қаласынан келген жас дарын Аслан Амангелдиев жеңіп алды.
Биыл фестивальда Қазақстанның еңбек сіңірген қайраткері, көп жылдар бойы осы байқауға қазылық етіп, талай таланттың жолын ашқан композитор Кеңес Дүйсекеев атындағы арнайы сыйлық тағайындалды. Тұңғыш жүлдені Қызылорда облысынан келген тағы бір талантты жас өнерпаз Ералы Ескендір иеленді.