Көше жарығының қазіргі жағдайына қатысты тұрғындардан көп сұрақ келіп түсуде.
Бұл туралы қала әкімі Ерболат Досаев Алмалы ауданы тұрғындарымен өткен кездесуінде айтты, деп хабарлайды Almaty-akshamy.kz.
«Жарықтың жиі өшуі, іркілістер, келіп түскен өтінімдерді орындау жылдамдығына қанағаттанбау орын алуда. Атап айтқанда, Алмалы ауданы бойынша күту уақыты 2 айға дейін жеткен, ал қызмет көрсету ұйымы тек 1 авариялық бригаданы қызметке тартқан», - деді қала басшысы Е.Досаев.
1 тамыздан бастап аудан «АлматыҚалаЖарық» акционерлік қоғамымен ауданның көше жарығына қызмет көрсету бойынша дербес шарт жасасты, аталған компания өткен айда жұмысын қарқындатып, тұрғындардың 50-ден астам өтінімін орындады (21 авариялық, 30 аула жарығы), Төле би (46%-ке аяқталды, мерзімі - 15 қыркүйекке дейін), Гоголь (58%, қыркүйек айының соңына дейін) көшелерінде, Абай даңғылында (жұмыс басталды, қыркүйек айының соңына дейін аяқталады) жарықтандыруды қалпына келтіру жұмыстарын жүргізді. Авариялар кезінде 7 бригада күн сайын шығып, өтінімдерді орындау уақыты 5 күнге дейін қысқарды.
