Алматы қаласының энергетика және сумен жабдықтау басқармасы жылу магистралінің қалпына келтірілгенін мәлімдеді, деп хабарлайды Almaty-akshamy.kz.
«Алматыдағы Шәріпов көшесінде (Шәріпов пен Гоголь көшелерінің қиылысының солтүстігінде) болған жылу трассасындағы апаттың салдары жойылды. 11 қарашаға қараған түні сағат 01.50-де «Алматы жылу желілері» ЖШС бригадасы диаметрі 400 мм құбырды қалпына келтіруді аяқтады, сынақ жүргізілгеннен кейін жылу магистралі пайдалануға берілді және түнгі сағат 2.40-та жылу беру қалпына келтірілді әрі белгіленген режимде жұмыс жасауда», - делінген хабарламада.
Сондай-ақ, Шәріпов көшесіндегі көлік қозғалысы қалпына келтірілді. Асфальттың жабындысын ауа райы қолайлы болған жағдайда осы жылдың 13 қарашасына дейін қалпына келтіру жоспарлануда.
Кенеттен жағдай туындаса (су, бу шығарындылары) +7-727-378-06-65 телефоны бойынша «АлТС» ЖШС апаттық-диспетчерлік хабарласуды әрі өз бетінше әрекет жасамауды және болған оқиға туралы хабарлауды сұраймыз.