Алматының Түрксіб ауданындағы Сәкен Сейфуллин саябағына да бүгінгі мейрамда халық көп жиналды.
2500-ден астам алматылық пен қала қонақтарын ұлттық киімдегі, тау тұлғалы батырлар қарсы алды, - деп хабарлайды aqshamnews.kz.
Ұлттық мәдениетіміздің ажырамас бөлігі болып саналатын тазылар мен бүркіттер де мейрамға ерекше сән берді. Үлкен-кішіге қазақтың ұлттық тағамы – Наурыз көже ұсынылды. "Қыдыр ата" сахналық қойылымы көрермендерін ежелгі аңыз-әфсаналар әлеміне саяхат жасатқаны анық.
Алматы қаласы Түрксіб ауданының мәдениет және тілдерді дамыту бөлімінің маманы Мәулен Оңласыновтың айтуынша, ұйымдастырушылардың қонақжай пейіліне бәрі дән риза.
Әуесқой спортшылар саябақ алаңында ұлттық спорт түрлерінен ұйымдастырылған жарыстарға қатысып, күші мен ептілігін сынға салды. Әр түрлі байқаулар мен викториналық ойындар да көрермендерін тартып әкетті. Бағалы сыйлықтар иеленген тұрғындардың эмоциясы да ерекше.
Саябақта қазақ халқының дәстүрлі тұрмысы мен қолөнерін көрсететін ақ шаңқан киіз үйлер мен шағын сәулет нысандары орнатылған. "Этноауыл" сурет көрмесі қонақтарға ата-баба тарихы мен мәдениетімен жақынырақ танысуға мүмкіндік берді.
Мерекенің нағыз хиті жасанды интеллект көмегімен бейнеңізді әп-сәтте түсіріп беретін "Жедел фотосурет" аймағы болған сыңайлы. Алаңға жиналған барлық адам бүгінгі жарқын күннің естелігі ретінде суретке түсіп жатты.
”Мен Сәкен Сейфуллин атындағы саябаққа жай күндері де жиі келемін. Отбасымызбен осында сейіл құрғанды ұнатамыз. Өте жайлы орта. Бүгінгі Наурыз мейрамының қызығын тамашалауға да бала-шағаммен келдім. Мерекені ұйымдастырған, осындай сәнді демалыс сыйлаған қала әкімдігіне алғыс айтқым келеді. Бізге "жедел фото" аймағы өте ұнады. Қазіргі заманауи технологияның, жасанды интеллектінің қуатына таңданбасқа шараңыз жоқ", – дейді әсерімен бөліскен Түрксіб ауданының тұрғыны Тұрсын Қонақаев.
Мерекенің шарықтау шегі жарқын концерттік бағдарламаға ұласты. Сахнада №6 Оқушылар үйінің дарынды шығармашылық ұжымдары, "Даму бала" бағдарламасының өрендері, "Әжелер" ансамблі, сондай-ақ отандық эстрада жұлдыздары өнер көрсетті.
Айгуль Колумбетова