Жұмыс сапары барысында Наурызбай ауданын аралаған Алматы әкімі Ерболат Досаев «Халық қатысатын бюджет» бағдарламасы аясында қолға алынған ірі жоба Шұғыла шағын ауданындағы жаңа қоғамдық кеңістікке барды.
Шағын аудандағы жаяу жүргіншілер аймағын абаттандыру тұрғындардың көптеген өтініштері бойынша жүргізілді. Ұзындығы 400 метр аумаққа ағаштар отырғызылды, автоматтандырылған суару жүйесі, шамдар мен орындықтар орнатылды. Жобаны іске асырумен «Stamp service» ЖШС мердігер ұйымы айналысты. Жұмыстар ағымдағы жылдың маусым айында басталды және қазіргі уақытта толығымен аяқталды, деп хабарлайды Almaty-akshamy.kz.
Наурызбай ауданының әкімі Назира Тоғызбаева қала басшысына жобада ересектердің де, балалардың да қажеттіліктері ескерілгенін баяндады. Тұрғындар 3 жыл бойы осы жерде жол жасауды сұрады. Алайда бос аумақта «Шұғыла city», «Alem city» ТК бағыты бойынша жүргінші жолдар ғана емес, сонымен қатар 90-100 автокөлікке арналған автотұрақ салынды. Мектеп жасына дейінгі балалар үшін лабиринттерден, үйлерден, слайдтардан, тоннельдерден, құмсалғыштардан, баспалдақтардан және басқа да тақырыптық элементтерден тұратын «Балаларға арналған қала» ойын алаңы жабдықталды.
Жұмыс сапары барысында аудан тұрғындары қала басшысына жаңа инфрақұрылымды: сауда орталықтарын, кинотеатрларды абаттандыру және салу туралы өтінішпен жүгінді. Ерболат Досаев жаңа аудандардың даму динамикасы оң екенін атап өтті. Қала оларды дамыту бойынша жобалар дайындауда, олар алдағы жылдары іске асырылатын болады.
Алматы әкімі Ерболат Досаевтың тапсырмасы бойынша биыл Наурызбай ауданы «Халық қатысатын бюджет» бағдарламасын іске асыруға қосымша 875 млн теңге алды. Осылайша, ауданда 2,7 млрд теңгеден астам сомаға 67 жоба іске асырылуда. Қосымша қаржыландыру туралы шешім осы бағдарламаның тиімділігі мен қала тұрғындарының оң пікірлерін ескере отырып қабылданды.
Бұған дейін қала басшысы атап өткендей, 2024 жылы «Халық қатысатын бюджет» бағдарламасын қаржыландыру ұлғайтылатын болады: қаланың 6 ауданына 2 млрд теңгеден және Алатау және Наурызбай аудандарына 2,5 млрд теңгеден бөлу жоспарлануда. Қосымша қаражат өзекті және сұранысқа ие жобаларды іске асыруға бағытталатын болады.