Өңірлік коммуникациялар қызметінде Әуезов ауданының әкімі Абзал Егембердиев инженерлік инфрақұрылымды жаңғырту мен сыртқы жарықтандыру жүйесін дамыту жоспары қалай іске асып жатқанын айтты, – деп хабарлайды aqshamnews.kz тілшісі.
Аудан басшысының мәліметінше, Достық шағынауданында 15,7 шақырым су құбыры мен кәріз желісі салынып біткен. Жоба аясында шамамен 800 үй қосылып, 3,5 мың тұрғын қамтылыпты.
Таугүл шағынауданында тағы 2 шақырым инженерлік желі салынып жатыр. Бұған дейін осы жоба аясында 23,6 шақырым коммуникация пайдалануға берілген. Жалпы алғанда, қазіргі жобалар шамамен 5,5 мың тұрғынды орталықтандырылған желімен қамтамасыз етуге мүмкіндік береді.
Бұған қосымша ескірген мекемелік желілері бар аудандарда 29 шақырым инженерлік желіні салу мен қайта жаңарту бойынша үш жоба әзірленбек.
«Біз тозығы жеткен желілер мәселесін жүйелі түрде шешіп жатырмыз. Негізгі міндет – тұрғындарды тұрақты әрі сапалы коммуналдық қызметпен қамтамасыз ету», – дейді аудан әкімі Абзал Егембердиев.
Сонымен қатар, коммуналдық қызметтер бірнеше шағынауданда 2,7 шақырым су құбыры мен кәріз желісін қайта жаңартуды жоспарлап отыр.
Жарықтандыруға да ерекше назар аударылды. Жыл басынан бері 6,3 шақырым кабель желісі қалпына келтіріліп, 51 тірек орнатылып, 755 шам ауыстырылды.
2026 жылдың соңына дейін:
• 29 шақырым желі қалпына келтіріледі,
• 318 тірек орнатылады,
• 2745 шам ауыстырылады,
• 20 жарықтандыруды басқару шкафы жөнделеді.