2025-2026 жылғы Алматылық студенттер лигасының маусымы шешуші кезеңге өтті. Күзгі кезең аяқталып, чемпионаттың көктемгі кезеңі басталды. Бұл туралы Алматы қаласының Спорт басқармасының мамандары айтты, – деп хабарлайды aqshamnews.kz тілшісі.
Биыл турнирге қаланың 35 жоғары оқу орнынан 108 команда қатысып жатыр. Жарыс үш спорт түрі бойынша өтеді: 11х11 форматындағы футбол, волейбол және баскетбол.
Басқарма мәліметінше, көктемгі кезең 2026 жылы ақпаннан мамырға дейін жалғасады. Маусым чемпиондары екі кезеңнің қорытындысы бойынша жиналған ұпайлар нәтижесінде анықталады.
Спорт басқармасы өкілдерінің айтуынша, студенттер лигасына деген қызығушылық жыл сайын артып келеді. Матчтар жоғары көрермендік белсенділікпен өтуде: спорт залдары жанкүйерлерге толы, ал студенттер мен университет қауымдастығы тарапынан қызығушылық тұрақты өсім көрсетіп отыр. Турнир қаладағы бұқаралық студенттік спортты дамытуға арналған маңызды алаңға айналды.
Барлық спорт түрі бойынша командалар жарысқа тегін қатысады.