Алматы қаласындағы Наурызбай ауданына қарасты №208 мектеп-гимназиясында бастауыш сынып оқушыларына арналған «Менің болашағым» атты ерекше шара өтті. Іс-шараны ұйымдастырудағы басты мақсат — балалардың әртүрлі мамандықтар туралы түсінігін кеңейту, болашаққа деген қызығушылығын ояту.
Мектеп директоры Гүлбағда Аденованың айтуынша, шара барысында шамамен 300 оқушы өздерін түрлі кәсіп иесі ретінде сезініп көрді.
– Біздің оқу орнымыздың аумағында «Мамандықтар қалашығы» форматында өткен іс-шараға әртүрлі бағыттағы мамандық иелері қатысты. Балалар дәрігер, өрт сөндіруші, полиция қызметкері, визажист, аспаз, тігінші, шаштараз сынды мамандардың жұмысын өз көздерімен көріп, тәжірибе жасап көрді, – деді мектеп директоры.
Шараға Алматы қаласындағы төрт колледждің әкімшілігі мен студенттері қонақ ретінде келіп, мектеп оқушыларына шеберлік сабақтарын өткізді.
Алматылық құрылыс-техникалық колледжінің арнайы пәндер оқытушысы Гүлсим Керімқұлованың пікірінше, бастауыш сынып оқушылары үшін бұл кезең болашақ мамандыққа деген алғашқы қадам болып табылады.
– Бұл жастағы балалардың қызығушылығы өте жоғары. Олар түрлі кәсіпті байқап көріп, өз қиялындағы мамандықты елестете бастайды. Визажист болып бет әрлеу, аспаз болып қамыр илеу – мұның бәрі олардың шығармашылық қабілетін дамытады. Ең бастысы – өмірлік мамандықты таңдау емес, білімге құштарлық пен өз-өзіне деген сенімділікті қалыптастыру, – дейді ұстаз.
Айта кетейік, аталған шара Қазақстан Республикасы Оқу-ағарту министрлігінің Балаларды қорғау күніне орай бекіткен медиажоспарына сәйкес өткізілді.
