«Жақыныңа жәрдемдес» акциясы жалғасуда
Алматыда «Жақыныңа жәрдемдес» акциясы жалғасып келеді. Бұл бастама «Алматы – біздің ортақ үйіміз» қалалық науқанның бір бөлігі болып табылады және республикалық «Таза Қазақстан» бағдарламасы аясында өтіп жатыр.
Жас еріктілер қаланың түкпір-түкпірінде аулаларды аралап, ерекше қамқорлықты қажет ететін жандарға – қарттарға, ардагерлерге, мүмкіндігі шектеулі азаматтарға көмек көрсетіп жүр. Ауланы тазалау, үй шаруасына жәрдемдесу, емен-жарқын әңгіме – мұның барлығына балалар шын жүректен кіріскен.
Мысалы, №200 мектеп-гимназиясының оқушылары Ақжар шағын ауданының тұрғыны Зуре Бекбергеноваға көмектесті: қоқыс шығарып, аула сыпырып, аумақты ретке келтірді.
— Біз жай ғана келіп, көмектестік. Бұл қиын емес, бірақ әже үшін үлкен көмек. Бізге де қуаныш, – дейді қатысушылардың бірі.
Наурызбай ауданында оқушылар зейнеткер Айзере Жұмаділге қол ұшын созса, Қарағайлыда Әтерхан Қасымбековаға көмек көрсетті.
— Қарттарға мұндай көмекті көрсету – басқаларға үлгі болу деп есептейміз. Қаланы таза ұстасақ, өмір сүру де жайлы бола түседі, – дейді №192 мектептің оқушысы.
Еріктілер қолдау көрсеткендер қатарында тыл еңбеккері Вера Мамонтова, 94 жастағы Ахметов Әлімхан, Зоя Қыдырова және т.б. қала тұрғындары бар. Олар үшін бұл акция – жай ғана аула тазалығы емес, бұл – қамқорлық, назар аудару және жаныңда сенің жағдайыңа бей-жай қарамайтын жандардың бар екенін сезіну.
Акцияға Алматы қаласының Жұмыспен қамту және әлеуметтік бағдарламалар басқармасының қызметкерлері де атсалысты. Соңғы аптада олар 142 жалғыз тұратын зейнеткер мен мүмкіндігі шектеулі адамға көмек көрсетті. Оның ішінде 74 жағдайда аулалар тазаланып, ұсақ жөндеу жұмыстары мен тұрмыстық шаруалар атқарылды.
