Алматыда тұңғыш рет 1 маусымда Республика сарайында «Жас қанат. Балалар – 2023» республикалық балалар шығармашылық байқауы өтті.
Осы байқауда “Вокал” номинациясы бойынша Алматы қаласы Оқушылар сарайының түлегі Дастан Тұрдалы “Самал Тау” қазақ халық әнімен Гран-при иегері атанды. Енді ол шілде айында «Медеу» мұз айдынында өтетін «Азия дауысы» халықаралық фестивалінде Қазақстанның намысын қорғайды, деп хабарлайды Almaty-akshamy.kz
Жүлделі орындар төмендегідей бөлінді:
1-орынды Түркістан облысынан Зере Жүнісбай,
2-орынды Маңғыстаулық Әмина Асгатова,
3-орынды Ақтөбе облысынан Балым Нсаналы иеленді.
Жеңімпаздарға алтын, күміс және қола қанаттардан бөлек, алдағы «Азия дауысы» халықаралық фестиваліне дайындық жұмыстары үшін Алматы қаласының әкімі Ерболат Досаевтың ақшалай гранттары табыс етілді.
«Гран-при алған кезде қатты қуандым және толқып кеттім. Музыкаға алғашқы қадамдарымды 3 жасымда бастаған едім, вокалға 5 жасымнан бастап бардым. Содан бері көптеген республикалық және халықаралық байқауларға қатыстым. Осындай жетістіктерге жетуіме ата-анам, Оқушылар сарайының ұстаздары көмектесті. Болашақта алған бетімнен қайтпай, өз кумирім Димаш аға сияқты стадиондарда, үлкен сахналарда өнер көрсетуді армандаймын», - дейді Дастан Тұрдалы.
Байқауды ұйымдастырушылардың айтуынша, «Жас қанат. Балалар – 2023» аңызға айналған «Жас қанат» байқауының тарихындағы жаңа бағыт болмақ. Еліміздің барлық облыстарынан келген 22 үміткердің өнерін республикалық эстрада шебері Әлібек Дінішев, «Жас қанат» байқауының бірінші Гран-при иегері Медеу Арынбаев, Жәния Әубәкірова, Байғали Серкебаев және басқа да белгілі мәдениет және өнер қайраткерлері бағалады.