2024 жылғы 11 тамызда Парижде XXXIII жазғы Олимпиада ойындары мәресіне жетті. Алматы спортшылары Қазақстанның намысын абыроймен қорғап, бірнеше медаль жеңіп алып, елдің спорттық беделін халықаралық аренада нығайтты.
20 тамыз күні Алматы қаласы әкімдігінде Олимпиада жүлдегерлерімен салтанатты кездесу өтті. Іс-шара аясында спортшыларға ақшалай сертификат, автокөліктердің кілті және тұрғын үй алу сертификаты табысталды. Ақшалай сыйақылар мен автокөліктер Алматы қаласы әкімдігі тарапынан дәл сол күні берілді.
Ал тұрғын үйге қатысты сертификат — атақты спортшыларды баспанамен қамтамасыз ету тетігінің алғашқы кезеңі. Сертификаттар табысталған соң, тұрғын үйді сатып алу рәсімі басталды. Бұл үдеріс арнайы бюджет қалыптастыруды және барлық мемлекеттік сатып алу рәсімін — байқау жариялаудан бастап келісімшартқа дейін қамтиды. Аталған рәсімдер заңнамаға сай қатаң тәртіппен жүзеге асады және белгілі бір уақытты қажет етеді.
2025 жылы 9 қаңтарда барлық заңдық және сатып алу рәсім толық аяқталды. Спортшыларға жайлы жағдай жасау мақсатында пәтерлерге таза әрлеу жұмыстарымен жөндеу жүргізілді.
Бүгінгі таңда барлық пәтерде жөндеу жұмыстары аяқталды. Алматы қаласы Спорт басқармасының қызметкерлері әрбір жүлдегермен байланыста болып, кілт табыстау күнін жеке-жеке келісіп жатыр (Олимпиада чемпионы Назым Қызайбайдың айтуынша, Спорт басқармасының қызметкерлері үнемі байланыста екенін және кілтті тапсыруға дайын екенін хабарлаған). Пәтер кілті Алматы қаласы әкімінің спортты қадағалайтын орынбасары Шаханов Б.М. тарапынан салтанатты түрде табысталады.
Алматы қаласының спорт басқармасы