Алматылық мемлекеттік қызметкерлер қоғаммен байланыстың заманауи әдістерін меңгерді, – деп хабарлайды aqshamnews.kz тілшісі.
Алматы қаласы Ішкі саясат басқармасының Қоғамдық даму орталығы тиімді коммуникацияны дамытуға, сындарлы диалог мәдениетін нығайтуға және кикілжіңнің алдын алу мен оларды шешудің заманауи тәсілдерін енгізуге бағытталған «Шекарасыз коммуникация: жанжалды жағдайларды шешу» атты семинар-тренинг ұйымдастырды.
Іс-шараға мемлекеттік қызметшілер, оның ішінде қала аудандары әкімдерінің орынбасарлары, сарапшылар, құқық қорғау саласының өкілдері, медиамамандар мен белсенді тұрғындар қатысты.
Семинардың негізгі мақсаты – қоғамдық келісімді нығайту, өзара түсінісу мәдениетін дамыту және мемлекет пен қоғам арасындағы өзара іс-қимыл тиімділігін арттыру.
Іс-шараның модераторы Бекнұр Сейтжанұлы Кисиков құттықтау сөз сөйлеп, қоғамдағы сенімді нығайту, ашық диалог қалыптастыру және коммуникативтік құзыреттерді дамыту әлеуметтік тұрақтылықтың маңызды факторларының бірі екенін атап өтті.
Семинар барысында спикерлер жанжалды жағдайларды басқару, медиа-коммуникация, құқықтық сауаттылық және қоғамдық қатынастар мәдениеті тақырыптарында өз тәжірибелерімен бөлісті.
Семинар спикерлері қатарында тарих ғылымдарының кандидаты, халықаралық деңгейдегі тренер, конфликтолог Жұмақаева Бақыт Дәулетханқызы, медиаменеджер, UNESCO Clubs KZ елшісі, Америкалық Бери Фаулер академиясының тренер-коуч Есен Махаббат Құрмантайқызы, адвокат, Алматы қалалық адвокаттар алқасының мүшесі Қалиева Жәмилә Болатқызы, Алматы қаласы Алмалы ауданы прокуратурасының аға прокуроры Әбдікәрімова Әсел Салманқызы бар.
Іс-шара аясында қатысушылар практикалық кейстерді талқылап, сындарлы коммуникация дағдыларын жетілдірді. Сонымен қатар жанжалдардың алдын алу, құқықтық және психологиялық қолдау тетіктері, бейбіт диалог мәдениетін қалыптастыру мәселелері қарастырылды.
Ұйымдастырушылардың айтуынша, мұндай форматтағы іс-шаралар қоғамдағы өзара сенімді арттыруға, тиімді коммуникация орнатуға және қоғамдық келісімді нығайтуға ықпал етеді.