Алматыда ерлер командалары арасындағы Ұлттық лига аясындағы XXXIV Қазақстан Республикасының баскетбол чемпионатының кезекті ойындары өтті, – деп хабарлайды aqshamnews.kz тілшісі.
14-15 наурыз күндері Champ1on спорт кешенінде өткен кездесулерде алматылық «Алматылық легион» клубы «Атыраулық барыс» командасын қабылдады.
Екі ойын да тартысты әрі шиеленісті өтті. Алаң иелері кездесудің шешуші сәттерінде жинақылық танытып, мінез бен төзімділіктің арқасында қарсыласынан екі рет басым түсті.
Матчтардың нәтижесі:
— «Алматылық легион» — «Атыраулық барыс» — 72:69;
— «Алматылық легион» — «Атыраулық барыс» — 74:72.
Өз алаңындағы қатарынан екі жеңіс алматылық клубтың турнирлік кестедегі орнын нығайтып, жанкүйерлерін қуантты.
Чемпионаттың келесі кезеңінде «Алматылық легион» елордалық «Астана» баскетбол клубымен кездеседі.
Алматы қаласы Спорт басқармасының мәліметінше, команда Ұлттық лигада тұрақты нәтиже көрсетіп, республикалық баскетбол аренасында қаланың абыройын лайықты қорғап келеді.