Алматылық нейрохирургтер жаттығу кезінде мойнынан ауыр жарақат алған жасөспірімге күрделі ота жасап, өміріне төнген қатердің бетін қайтарды, – деп хабарлайды aqshamnews.kz тілшісі.
Алматы Балалар шұғыл медициналық көмек көрсету орталығында жаттығу барысында мойын омыртқасынан ауыр жарақат алған 14 жастағы спортшыға ота жасалды.
Оқиға шамамен екі ай бұрын күрес үйірмесіндегі жаттығу кезінде болған. Белдесу барысында жасөспірім басымен төмен құлаған. Құлаған сәтте мойны қатты ауырып, кейін әлсіздік, бозару және қолының ұюы байқалған. Жағдайы жақсармаған соң, отбасы дәрігер көмегіне жүгінген.
Тексеру кезінде дәрігерлер мойын омыртқаларының бірінің сынғанын және омыртқалар түйіскен тұста ығысудың барын анықтады. Бұл жұлынға зақым келтіруі мүмкін аса қауіпті жағдай еді.
Жасөспірім шұғыл түрде ауруханаға жатқызылып, оған ота жасалды. Дәрігерлер зақымданған омыртқаны өз орнына келтіріп, мойын бөлігінің дұрыс бітуі үшін арнайы тәсілмен бекітті.
Ота шеберлік сабағы түрінде өтіп, оған тәжірибелі жұлын нейрохирургі Тимур Айтмұханов пен орталық мамандары қатысты.
Алматы Балалар шұғыл медициналық көмек көрсету орталығы нейрохирургия бөлімшесінің меңгерушісі Рахым Аханның айтуынша:
«Мойын омыртқасының жарақаты - ең қауіпті зақымдардың бірі. Бұл жағдайда дер кезінде ота жасап, ауыр асқынудың алдын алдық. Қазір баланың жағдайы тұрақты, сауығып келеді».
Емнен кейін жасөспірімнің жағдайы қанағаттанарлық деп бағаланып, ол үйіне шығарылды. Алдағы уақытта тұрғылықты жеріндегі дәрігерлердің бақылауымен оңалту шараларынан өтеді.