Алматыда еріктілік қозғалыс қарқынды дамып келеді. Бүгінде қалада экологиялық, әлеуметтік, патриоттық және қайырымдылық жобаларды жүзеге асыруға атсалысып жүрген 58 мыңнан астам ерікті бар. Бұл туралы қалалық Жастар саясаты басқармасының өкілдері айтты, – деп хабарлайды aqshamnews.kz тілшісі.
Еріктілер «Таза Қазақстан» және «Заң мен тәртіп» бастамаларын іске асыруға белсенді қатысады, халықтың әлеуметтік осал санаттарына көмек көрсетеді, экологиялық акцияларға, мәдени және спорттық іс-шараларға атсалысады, сондай-ақ өздерінің қоғамдық жобаларын жүзеге асырып келеді.
Солардың бірі қалалық аумақтарды тазартуға бағытталған Project Virus экологиялық жобасы. Бүгінде бұл бастама Алматыдан басқа жерлерде де жалғасып, Қазақстанның тоғыз қаласында қолға алынған. Жобаға 5 мыңнан астам ерікті жұмылдырылған.
Сондай-ақ, Lider.kz іздестіру қозғалысының еріктілері де маңызды үлес қосып келеді. Жоба жұмысына 8 мыңнан астам ерікті тартылған. Олардың көмегімен із-түзсіз жоғалған 350 адам табылды.
Әлеуметтік осал отбасылар мен жетім балаларға атаулы көмек көрсететін Zharyq Volunteers ұйымының қызметі де ерекше маңызға ие. Соңғы бір жылдың ішінде олардың қолдауына 800-ден астам отбасы ие болды.
Қалалық Жастар саясаты басқармасы өкілдерінің мәліметінше, бүгінде еріктілер экология, әлеуметтік көмек, мәдениет пен спорт, қауіпсіздік, медиа, кәсіпкерлікті дамыту және еріктілік институтты дамыту сияқты сегіз негізгі бағыт бойынша жұмыс істейді. Еріктілік қозғалысты дамыту қаладағы жастар саясатының басым бағыттарының бірі болып қала береді және тұрғындарды қоғамдық маңызы бар бастамаларды жүзеге асыруға кеңінен тартуға ықпал етеді.