Алматыдағы Зерделі шағынауданында жаңа мектеп құрылысы аяқталуға жақын, – деп хабарлайды aqshamnews.kz тілшісі.
Жаңа оқу жылында Алматының Алатау ауданындағы Зерделі шағынауданында 550 орынға арналған заманауи мектеп ашылады.
Жалпы аумағы 7,4 мың шаршы метр болатын үш қабатты ғимарат 5-11 сынып оқушылары үшін жайлы білім беру кеңістігіне айналмақ. Жоба аясында оқушылардың сапалы білім алуына, шығармашылық және зияткерлік дамуына қажетті заманауи жағдай қарастырылған. Әр сыныпта 25 оқушыға дейін болады.
Қалалық Құрылыс басқармасының бас маманы Ербол Османовтың айтуынша, қазіргі уақытта нысанда іске қосу-баптау жұмыстары жүргізіліп, ұсақ ескертулер түзетілуде. Құрылыс-монтаж жұмыстары толықтай бір ай ішінде аяқталады деп жоспарланып отыр.
Мектепте 22 оқу кабинеті болады. Оның ішінде физика, химия және биология зертханалары, мультимедиялық кабинет, екі компьютерлік сынып және робототехника кабинеттері бар. Сондай-ақ, спорт залы, 162 орындық акт залы, оқу залы бар кітапхана, медиатека және 12 мың дана оқулық сақтауға арналған қор жұмыс істейді.
Ғимараттың бірінші қабатында 229 орындық асхана, барлық сыныптарға арналған гардероб аймақтары, әкімшілік бөлмелер мен оқу шеберханалары орналасады.
Мектептің аумағы 2,3 гектар. Мұнда спорт және ойын алаңдары салынып, кешенді көріктендіру мен көгалдандыру жұмыстары жүргізілген.