Алматыдағы Lake Town тұрғын үй кешенінің аумағында қалдықтарды бөлек жинауға арналған экологиялық акция өтті, – деп хабарлайды aqshamnews.kz тілшісі.
Алдын ала мәлімет бойынша, іс-шараға қатысушылар 200 келіге жуық қайта өңдеуге жарамды қалдық жинаған. Бұл туралы «Eco Almaty» ЖШС өкілдері айтты.
Акция барысында пластик қақпақтар мен бөтелкелер, макулатура, полиэтилен, шыны ыдыстар, алюминий банкалар, батарейкалар, сондай-ақ құрамында сынап бар шамдар қабылданды.
Көпшіліктің назарын аударған орындардың бірі пластик қақпақтарды ұсақтайтын велосипед құрылғылары болды. Қатысушылар педальді айналдыру арқылы қақпақтарды өздері ұсақтап, пластикті қайта өңдеуге дайындау үдерісімен танысты.
Акцияны қалдықтарды бөлек жинау мәдениетін дамыту және экологиялық сауаттылықты арттыру бағытында жұмыс істейтін ECO Network экологиялық қауымдастығы ұйымдастырды.
Жиналған қалдықтар одан әрі қайта өңдеуге жіберілді. Қайта өңделген пластиктен салпыншақтар, тіреуіштер, интерьер бұйымдары, жиһаз және түрлі арт-нысандар жасалады.